Biennale Gherdëina, senteda ite danter la marueia dla Dolomites, arpejon mundiela naturela UNESCO, à l plajëi de ve fé al savëi che Samuel Leuenberger ie unì numinà curadëur de si diescejima edizion. Tres cumiscions nueves y n program de mostra che se stiza sun proiec dl ambient y scumenciadives publiches ie la Biennale chersciuda te na forma organica do uni edizion y à tëut su l mond dl’ert nternaziunela, ma à tl medem mumënt mantenì n liam strënt cun la ravises cultureles, storiches y linguistiches dl raion da mont. N uel zënzauter ti jì do a chësta vijion, ma nce jì ite liams nueves y mo nia cunesciui, nsci unirà Biennale Gherdëina a se l dé a Urtijëi y ntëur via te Gherdëina dai 29 de mei ai 13 de setëmber 2026.
Samuel Leuenberger ie l fundadëur y diretëur de SALTS, n raion per mostres no-profit a Birsfelden y a Bennwil, tla Svizera, che cëla de sustenì l barat danter disciplines defrëntes y l dialogh cun artisć che ie tl lëur de unì a lum. Dan da puech iel stat l curadëur dl proiet Messeplatz per Art Basel y al mumënt lëurel pra la terza y ultima edizion dl proiet Globus Public Art n culaburazion con la Fondation Beyeler. Dal 2016 al 2023 iel stat curadëur dla sezion Parcours de Art Basel.
Si vijion da curadëur se stiza sun la culaburazion, sun l’empatia e sun l ruvé permez. Davia che l lëura suvënz cun artistes y artisć cun chëi che l à relazions per plu giut, sustën Leuenberger formes de partezipazion che va plan y ie reflessives sun l’ert, l’architetura y la natura y dà nsci vita a esperienzes da ntënder y stimulëntes.
IN resposta ala numineda dij Leuenberger:
„Son plën de ntujiasm y unerà de vester unì numinà curadëur dla diescejima edizion de Biennale Gherdëina, che vën a se l dé te n raion da stramp bel. La Dolomites ie te n cuntest faszinënt, ie plëines de belëzes dla natura, de tradizions d’ert y de stories zënza tëmp sun i crëps: n post ideél per ti jì do al’idea di (Future) Paradise Gardens – Verzons dl Paravis (dl daunì). Chisc verzons ie de bujën danter la grandëza salvera dla natura y la cultura senteda ite dala persona, nia mé coche santueres per la flora y la fauna, ma nce coche lerch che spidlea nosc miré n referimënt a n daunì che se stiza sun la giustizia y la valivanza. Te chësc ntëurvia pudons se nmaginé verzons che nurësc sibe l corp che l’ana, luesc per se tré zeruch y pusciblteies per dutes y per duc.“