Biennale Gherdëina 10: (Future) Paradise Gardens – Verzons dl Paravis (dl daunì), a cura de Samuel Leuenberger, unirà a se l dé a Urtijëi y te d’autri luesc de Gherdëina dai 31 de mei ai 13 de setëmber 2026. La giaurida sarà te posć defrënc te Gherdëina, n sada ai 30 de mei 2026 (comunicazion stampa danora: 28 de mei 2026).
Chësta edizion che vën de Biennale Gherdëina ie n pont fundamentel dla storia de chësc evënt, festejon cun stolz la diescejima edizion.
(Future) Paradise Gardens – Verzons dl Paravis (dl daunì) ie n nvit a passé tres cuntredes che ie tl medem mumënt delicates y muvimentedes, ulache i verzons devënta n simbol de sëuravivënza, de amor y na puscibltà per n daunì plu rëidl.
Samuel Leuenberger conta:
“La Dolomites pieta na culissa ispirënta che ie rica de belëzes natureles, de tradizions artejaneles y stories dla montes zënza tëmp – na curnisc ideela per scuvierjer l cunzet di (Future) Paradise Gardens. Chisc parcs, sentei ite tl pont d’ancunteda danter sublimità naturela y cultivazion umana, ne ie nia pensei mé coche luesc de scunanza per l rëni dla plantes y di tiers, ma nce coche lueges che respidlea nosta tingëda coletiva do n daunì che à si fundamënta sun la giustizia y la valivanza. Tlo pò i parcs nudrì tambën l corp che l’ana y ughé coche luesc de albierch, de oportunità y de renuvamënt per duc.
La mostra ie partida ite te capituli desferënc, uniun de chisc luminea n auter aspet dla criazion dl parch fat dala persona. Da n pont de ududa simbolich, metaforich y emuzionel raida i argumënc ntëur l cunzet de „Commoning“, che mët dancà la cultivazion y la cundivijion dl nudrimënt coche nce la scunanza y la stravardeda dla fusties de uni vita. N auter capitul dal titul “Divine Love and Growth” (Amor divin y chersciuda) nvieia a cunscidré l verzon coche simbul de fluridura spirituela y de trascendënza, y la mostra se dà ju cun l cunzet de “Violent Garden”(Parch impunënt), che respuend al bujën de prëscia de decolonisé l parch, de mëter n discuscion vijions antropozentriches y de crië lueges acioche i tiers y la natura posse se muever tla lidëza y abiné ca inò si capazità d’azion.
Tl capitul sun „Queer Ecology“ se damànden ciuldì che la natura vën perdrët suvënz ntenduda coche „fetra, demarueia“ y tlo vëniel slargià ora la discuscion sun la varietà y la fluidità dedite dai sistems ecologics. Oradechël tuons do l “Botanical” (Botanich) – l urdenamënt y la tlassificazion di ejemplers de plantes – n cunfront a “Gardens as Spaces for Reflection and Poetry”(Parcs coche lerch de reflescion y poejia), te chëi che i verzons se trasforma te luesc de introspezion, belëza y imaginazion criativa.”
Artistes y artisć dla Biennale Gherdëina 10:
Chanelle Adams (1992, USA), Andrius Arutiunian (1991, Armenien/Litauen), Jacopo Belloni (1992, Italien), Alice Bucknell (1993, Großbritannien/USA), Leonardo Bürgi (1994, Mexiko/Schweiz), Giulia Cenci (1988, Italien), Dorota Gaweda (1986, Polen) & Eglė Kulbokaitė (1987, Litauen), Sandra Knecht (1968, Schweiz), Judith Neunhäuserer (1990, Italien), Walter Niedermayr (1952, Italien), Masatoshi Noguchi (1988, Japan/Italien), Gabriela Oberkofler (1975, Italien), Lydia Ourahmane (1992, Algerien), Gregor Prugger (1954, Italien) & Leonora Prugger (1995, Italien), Ana Prvacki (1976, Serbien), Augustas Serapinas (1990 Litauen), Bas Smets (1975, Belgien) & Eliane Le Roux (1983, Frankreich), Bosco Sodi (1970, Mexiko), Constantin Thun, Kelly Tissot (1995, Frankreich), Alvaro Urbano (1983, Spanien), Yuyan Wang (1989, China), Evelyn Taocheng Wang (1981, China), Pedro Wirz (1981, Brasilien/Schweiz) & Michael Marder (1980, Kanada/Portugal).