11:00-12:30 – Pilat – Mëisa turonda cun Bas Smets, Vartan Karapetian y Giovanna Melandri
15:00-17:00 – Info Point Biennale, Urtijëi – Vijita meneda debant, tla sëntes dla Bienela a Urtijëi
17:00-19:00 – Plaza Stetteneck, Urtijëi – SaDajons ora la plantes dla nstalazion (Future) Paradise Gardens, cun l’architeta dl paesaje Eva-Maria Schgaguler
Biennale Gherdëina 10 (Futur) Paradise Gardens, fina via cun n di speziel plën de manifestazions, scumencian dala 11:00 cun na mëisa turonda, ulache sarà l architet dl paesaje y artist dla Bienela Bas Smets, l autëur Vartan Karapetian y la Presidënta dla Human Foundation Giovanna Melandri. L’ancunteda sarà na ucajion per jì plu sot tla tematiches dla nrescida de Smets y Degrees of Elevation, la nstalazion che ie da udëi ala Bienela Gherdëina dl’artist deberieda cun la diretëura artistica Eliane Le Roux. L proiet ie unì svilupà aposta per l raion sa Pilat per nrescì la fazions dl mudamënt tlimatich tla Elpes. Pra la mëisa turonda saral nce la prima prejentazion a livel europeich de The English Park, An Ecology of Memory in Yerevan, publicheda da Armenian Arts Council Editions, cun la prejënza dl autëur Vartan Karapetian. L liber tol tres la storia y l patrimone culturel dl English Park de Yerevan tulan ite cuntribuc de Norbert Peeters, Aram Pachyan y Marina Haroyan. La publicazion ie stata fata n ucajion dla United Nations Biodiversity Conference, l ancunteda nternaziunela dedicheda ala biodiversità, che sarà a Yerevan dai 19 ai 30 de utober 2026.
Pilat ie da arjonjer mé a pe dal zënter de Urtijëi demez te 40 menuc tres l troi numer 15.
Dala 15:00, l publich ie nvià a fé pea debant pra l’ultima vijita meneda tla sëntes de espusizion dla Bienela a Urtijëi. La vijita scumencerà dal Info Point tla Sala Trenker y durerà plu o manco 90 menuc.
L di se stlujerà ju, dala 17:00 ala 19:00, pra la nstalazion (Future) Paradise Gardens sun Plaza Stetteneck a Urtijëi, cun na azion performativa dedicheda ala cundivijion y ala cuntinuità dl verzon. L’architeta de paesaje Eva-Maria Schgaguler menerà l publich tres la plantes ora, n gest de cundivijion y de cura che ti lascerà pro ala plantes de jì inant sun si streda nce do la Bienela, trasfurman la nstalazion te na rë sterscia de relazions y respunsablteies.
Duc i apuntamënc dl di dla finissage ie debant. L ne vën nia damandà prenotazion.