Te Gherdëina uniral dai 31 de mei ai 13 de setëmber 2026 tenì la diescejima edizion dla Biennale Gherdëina, dal titul (Future) Paradise Gardens, a cura de Samuel Leuenbergery che se dejëuj te trëi lueges d’esposizion prinzipeles.
Coche l ie tradizion per la Biennale Gherdëina nasc la identità vijiva de uni edizion dala culaburazion cun n artist o n’artista che tol pert als bienala – tl 2024 cun Atelier dell’Errore, tl 2022 cun Giles Round, tl 2020 cun Marcello Maloberti. L’identità dla diescejima edizion ie unida svilupeda cun Alice Bucknell, che nterpretea cun si lëur da na gran sugestion l tema dla Biennale (Future) Paradise Gardens, te na esplurazion de na lingia de argumënc y cunzec defrënc liei al “verzon dl paravis”.
L cunzet ie unì svilupà da XXY Studio de Milan sota la direzion de Massimo Lafronza. L design ne se cunzentrea nia mé sun l lëur de Bucknell coche soget prinzipel ma l tol nce su elemënc dl’opra d’ert nstëssa crian nsci na interazion visuela direta cun l tema dla Biennale: formes y linies organiches, pustoms che se desfurmea y crësc coche nce n “gradient” che flurësc y che acumpanieia i/la vijitadëures sëura mesuns de comunicazion defrënc ora – se muan, flurian y sfantan inò.
“(Future) Paradise Gardens” ie na rezeta per nes lascé evoché truep monc, y na meludia che nes mëina inò de reviers ala tiera. Te si truep capituli ntrecei l un cun l auter vëniel a se l dé na narazion defrenzieda, che ie da una pert nraviseda tl ecosistem unich dla Dolomites te chël che la Biennale se spand ora y che sofla dal’autra pert coche bon tof ncëurnient, daujin y dalonc, tres cuntredes reéles y imaginedes, antropogenes y autonomes. “L ie per mé n unëur pudëi purté ite tla BG10 l juech da vivanda dla forzes ecosistemiches di monc de mi lëur y me ncunforte sun l spënjer nia custemà che chësc avenimënt dla impolinazion gaujerà ti mënsc che vën”,
dij Alice Bucknell sun la culaburazion cun la Biennale Gherdëina.
La Biennale Gherdëina 10 – (Future) Paradise Gardens vën tenida dai 31.05. ai 13.09.2026 te Gherdëina, tl cuer dla Dolomites y la nvieia i/la vijitadëures a interagì cun l’ert, l post y l ambient sëura trëi lueges ora.
La giaurida sarà ai 30.05.2026 dala 10:00 inant tl zënter de Urtijëi.