Kyriaki Goni
∗1982, Athens
Tl´opra de Kyriaki Goni The mountain-islands shall mourn us eternally (data garden dolomites) vëniel dat inant n senial. N ibrid dla planta autoctona dla Dolomites, la Saxifraga depressa, tol su cuntat cun la persona a inuem de duta la plantes de si sort. La planta migrea for plu y plu al’auta pervia dl aumënt dla temperatures y dl sfrutamënt dla ressurses dla tiera. Iel pa n pue‘ de speranza o murirà pa ora la vita coche la cunescion sun la ijules di crëps? La planta dà inant nfurmazions tres n liam dezentralisà de cumenanzes tecno-sciamaniches, che ie sparpaniedes ora sun dut l planet y che ie cunesciudes coche “data gardens“. I “data gardens“ ie verzons endemics de plantes autoctones che crësc mé plu te n pitl raion geografich y ecologich. L se trata de pitla cumenanzes sucrëtes sun dut l mond che cunservea na memoria digitela tl DNA dla plantes, y tl medem mumënt unereieles chësta memoria y la tën al segur. Chësta rë afetiva, che va contra la pratiches de tò ora la ressurses da la tiera y contra l capitalism de cuntrol, se cunzentrea sun l bënsté y la solidarietà danter la sortes.N ucajion dla Biennale Gherdëina ∞ prejënta l’artista na cumenanza nueva dl “data garden“ y na planta nueva, n ibrid de Ortiseia leonardii, na conifera fossiliseda che vivova dan 260 milions d’ani, y Saxifraga depressa, n ciof rer che crësc sun la Dolomites sëura i 2000 metri y che ie scialdi rie da abiné. Pervia dl sfrutamënt ora de mesura, i problems ambientei regionei y l aumënt dla temperatures ie truepa plantes dl raion sfurzedes a migré de viers dla pizes, jan a crì temperatures plu basses. Les se spusterà for plu y plu insù sun i crëps y ala fin murirales ora.
Tl lëur de Goni va la plantes inant coche oraculi, mustran la cunescënzes dl passà, la tradizions mitologiches dl raion y la storia paleo-geologica, ma nce si previjions y festidesc per l daunì.
Pra l video prejënta l’artista nce n model de lën dla planta ibrida, aldò dla tradizion di modiei botanics dl 19ejim secul, mudelà y ziplà tl raion de Urtijëi. N talisman dla cumenanza de “data garden“ sarà da garat te RA sun Instagram.
À partecipé a:
