Revital Cohen & Tuur Van Balen
∗1981/1981, Jerusalem/Leuven
lives and work in Paris
L lëur de Revital Cohen y Tuur Van Balen se mostra tres ogec, istalazions y films, sopiëi da nrescides longes y a puntin, cun l fin de nfruscé i pruzesc de produzion cuntemporans coche pratiches cultureles, persuneles y politiches. La ciera: oradenia vàn ora d’uega, n se sprigulea o n sënt na tëma fisica. À pa i crëps giapà la ciera canche l mer s’à trat ndò y l ie unì docà la cuntreda de chëla che se ntendon ncueicundì? Sons’a mo boni de recunëscer tla forms di crëps i corps dla criatures antiches dl’ega, ti minerei si osc che ie sën deventei curëc te chësta cuntreda? N liquid brum smort regor tres i festìi dla zità y ite tl terac: n liquid brum linëus y sluminënt, che semea sanch, che cunliëia i crëps, l mer, i corps umans y de tiers, mic, medejina, ecologies preistoriches y capitalistiches. N brum ftalich da ciauc y sluminënt; l lat de n crëp, o povester l raspuc da tuesse de n pruzes chimich? L sanch culëur ram de na raza aliena che ntënj la ciera dl crëp, ntanche l sanch regor demez dala pel deviers dl cuer? La ciera testemuniëia l passà preistorich y ozeanich dla Dolomites – n sanch brum blanchic, scunesciù ala majera pert, y che sustën dl auter viers la ndustria farmazeutica. Drët na vedla raza aliena se à ntanà tl’opera. Ti selfs espositifs dl Museum de Storia Naturela de Bulsan pàussel ejemplers vives de crëibes a fiër de ciaval (Limulus polyphemus), na raza de dan i tëmps di dinosaurs. Ratà de trueps viersc n “curët vivënt”, ie l crëibes a fiër de ciaval stat ti tëmps testemon de canche milions d’autra razes ie unides su y ie mortes ora. Si relevanza tla vita d’aldidancuei ie ndlonch presënta: belempont vën l crëibes a fiër de ciaval sistematicamënter tëut ora da si nturiënt naturel da pert dla ndustria farmazeutica, che adrova si sanch brum che toma tl uedl, rich de ram, coche biosensëur per identifiché bateries y svilupé vazins. Chësta criatura, sëuravivuda a tëmps dla dlaciazions, a cater estinzions y a n meteorit, ie dan’ da puech unida metuda ite tla lista dla razes manacedes dl IUCN tla speranza che la sëuravive ala ndustria farmazeutica.
À partecipé a:
