Bosco Sodi
∗1970, Mexico
Bosco Sodi (1970, Mexico City, Mexico) viv y lëura a New York City y a Oaxaca.Sodi ie cunesciù per adurvé materiai cruves, naturei per fé pitures y scultures struturedes de gran format. L mët l focus sun la forza emotiva, che ie tl material nstës. Formes minimes vën cumbinedes cun pigmënc lucënc, per renfurzé la forza emotiva dl’opres d’ert. L artist se lecorda: “La belëza dl’imperfezion me faszinea y ie stime la belëza, che ne ie nia perfeta, che passa y che ne ie nia cumpleta. L fat che n ne possa nia cuntrolé l resultat l fej mo plu senificatif. La cosses se muda tresora y messon azeté che ne on degun cuntrol sun ëiles.” Te si pitures da un n culëur mescëida Sodi pigmënc cruves cun lën, cartapesta, paia, d’autra fibres natureles y cola, per crië sperses spësses. Ntan che i strac defrënc se sëcia, vëniel a se l dé te na maniera naturela formes y linies, che crieia na sinergia danter l pruzes creatif dl artist y l vester che n ne possa nia udëi danora dla natura.
Sodi ie l fundadëur dla Fundación Casa Wabi. La lerch creativa dessenieda dal architet Tadao Ando, ie daujin a Puerto Escondido y ti dà albierch a n program de spezialisazion artistica, mostres, prejentazions de films y workshop.
A Urtijëi, mët Sodi ora danter i lëns na grupa de pitli chedri a forma chedra. I lëures ie metui su sun na strutura scëmpla a forma de “T”, ei semea sibe prutejei, che nce te pericul, danter cura y vulnerabltà. Metui ora a autëzes desfrëntes, luna l culëur cueciun ora dassën, fajan da cuntrast cun l cuntest urbanistich y frenetich che ie ntëurvia.
Uni pitura mostra na strutura mplenida. Davia che les ie fates cun strac grosc de pigmënt y material grove, se sfruzieiles ntan che les suia, trajan sfëntes che lecorda paesajes secëi ora, la tiera brujeda o la furmazions minereles. Chisc sënies ne vën nia fac, ma i nasc danter l’azion dl artista y l cumpurtamënt dl material nstës.
Metui ora alauta sun i lëns, giapa i chedri n’autra funzion, chëla de vester n nvit, n seniel, o n post per se scuender. Te chësc cuntest nuef, mët si culëur sterch y si sensibltà grovia n relazion a n sentimënt ciaut y n material che nes lecorda autra geografies, cun l’autëza y l se mustré dla Dolomites.
