Augustas Serapinas
∗1990, Lithuania
Augustas Serapinas (1990, Vilnius, Lituania) viv y lëura a Vilnius. L artist fej nstalazions de gran format cun materiai che vën ora da cuntesć storics, culturei y politics spezifics. Mudan la prejentazion de chisc elemënc y ogec architetonics – i tulan ora da si cuntest uriginel y i metan ite te na sala de espusizion – muda Serapinas la perzezion di ogec da fonz su. Tres chësc spustamënt tl spazium à l artist auzà ora la stories che taca adum cun i ogec y l’architetura: i lecorc, la persones y i luesc de chëi che i testemunieia.“Nëus udon la cësa for coche n cunzet scialdi monumentel. Ma tl cajo de n’architetura tradiziunela de lën possela unì desfata, spusteda y metuda adum per deventé zeche d’auter. A chësta maniera possen ti cialé al frabicat y a si pertes da n auter pont de ududa. Ie vëije la desdruzion coche na forma de mantenimënt. [...] Ie frabiche zeche d’auter – nia plu na cësa. Nscila vëniel ora l’idea plu mpurtanta de chësc frabicat: la modularità. Canche la desfeje y mostra su si pertes, pënsi do sun l vester de chësta sort de architetura. Ie lëure mé cun cëses, che dëssa unì desfates defin. Datrai iel nce scialdi naturel che chisc frabicac sparësc. Chësc possa vester na pert dl pruzes.”
Per la diescejima Bienela Gherdëina, à Serapinas spustà na hitia de Mont de Sëuc. N iede univa la strutura adurveda coche tublà per l fën, che ova mo leprò na pitla cësadafuech y na majon, ma śën ne fovela nia plu n funzion. Pian via da si costruzion n “Blockbau”, vëij l artist la strutura sciche n sistem moduler, ulache uni tram de lën vën numerà, tëut ndolauter per pudëi inò l mëter adum.
La hitia, metuda su tl zënter a Urtijëi, ne ie nia stata unida fata do un a un, ma la ie stata unida metuda nscila coche l artist à minà. I trames ie metui adum y balanzei ora zënza massaria sëuraprò. La hitia ne n’ie nia plu n post per dé albierch, la devënta n magasin y n monumënt dl tëmp passà.
La nstalazion mostra l lën, coche n material pesoch, ma auza nce ora si cualiteies fragiles. Si recunfigurazion se svilupea coche n sëni dopl: tres la decostruzion fisica mëtela n descusion l’idea nstëssa dla cësa. Te chësta situazion, lecorda la strutura la cuestion materica y l putenziel che ie ascundù, tulan ite la lerch publica, aspitan de unì inò trasfurmeda.
In collaboration with
