Alice Bucknell
∗1993, UK/US
Alice Bucknell (1993, London, Rëni Unii) viv y lëura a Los Angeles. Ëila ie n’artista, scritëura y educadëura. Si pratica nasc tl mond di juesc: i monc virtuei che vën criei devënta plataformes per espluré cuestions reéles che à da nfé cun l’ecologia, la ressorses y la nteligënza artifiziela. Tres chisc monc paralei va l’artista sëura la tenscions ora, tres chëles che la persona à storicamënter analisà si cuntest - uman contra mascin, artifiziel contra naturel, ndividuel contra coletif.“Pënse che l juech ie la maniera de ti jì permez al mond belau coche a nascer da nuef: te muesses mparé dut da nuef [...], y chël possa vester n luech propi da forza y poetich [...]. L juech se gëura a na sort de umiltà, de dejemparé che ie per mé na luegia veramënter poetica per scumencé a pensé do sun dumandes n cont dl’ecologia, dl daunì, di cunfins dl savëi scientifich y de d’autra sortes de sistems de dac.” Bucknell ie la prima artista de chëla che i videojuesc ie ruvei ite tla culezion permanënta dl Museum of Modern Art de San Francisco (SFMOMA).
Tl partimënt dessot dl Hotel Adler, prejënta Bucknell Ground Truthing, n film simulà, de 17 menuc, metù ite te l ambient dla scultura. La nstalazion, ie metuda ora puech sota l livel dla streda prinzipela, ntëur a n schermo vertichel cun dlongia na lingia de copies de ciuc de lëns, ziplei y sfriei cun la mascin CNC. I ciuc, fac da artejans dl post, giata la funzion de pitli stuei per i vijitadëures. Chisc elemënc ie da udëi, sibe coche ogec funziunei che nce coche elemënc de mediazion, metan nscila i vijitadëures te na situazion, danter n mond animà dal video y la prejënza de na recostruzion digitela dla formes de lën.
L film nriesc, coche la tecnologies sciche i satelic y l GPS, nfluenzea nosta idea viers dl tlima tl daunì. Jan tres cater ambienc desfrënc, dai bòsc da plueia, ai icebergs che se dlëiga y ala ziteies digiteles, fejela n cuntrast danter i modiei basei sun dac scientifiches y formes plu daujin a nëus. La parola 'ground truthing' (verificazion sun l ciamp) fej referimënt ala verificazion di dac mandei da n satelit tres l'esperienza fisica y vivuda.
La nstalazion fej n cunliamënt danter la simulazion digitela y la realtà dla materia, ulache l lën devënta n elemënt che mët adum, i sistems ecologics, la vijion tecnologica y i cunfins dla previjion dl daunì.
