Gabriela Oberkofler
∗1975, Italy
Gabriela Oberkofler (1975, Bulsan, Talia) ie n’artista de Südtirol che viv a Stuttgart. Te si nstalazions fates cun elemënc naturei y te si dessënies sibe de pitl che de gran format, sun papier o sun parëies, auzela ora la pert che la natura à tl mond de al didancuei.Te si dessënies da culëur y cun truep details, metui adum da linies y formes, sotrissea Oberkofler la vivanda dla sortes de plantes y de tieres y si ntravaiamënt cun l’ejistënza umana. L ntercià de ciofs, ravises, iermes y pleces, che se nravisea te si nstalazions y dessënies, coche nce i archifs dla sumënza, che la tën su cun cura, desmostra si faszineda per la richëza, la varietà y la resistënza di ecosistems naturei.
Oberkofler spidlea la perduda dla ressorses natureles, mustran su coche chësta ie lieda al sparì di habitat y di raions de cultura: “Mi fin ie chël de mustré che l mancia zeche.” A Flaas, ti crëps daujin a Bulsan, à l’artista metù a despusizion dl publich si luech da paur de familia, l Taberhof. La ti à dat inuem Istitut per l’agricultura alternativa, per l’ert cuntemporana y per l viver tla periferia, metan a jì iló mostres y proiec artistics.
Oberkofler trasfurmea na butëiga ueta dlongia l raion da jì a pe de Urtijëi, per fé dainora n local danter na berstot y n verzon da zidlé plantes. Tulan ispirazion dala storia dl “ultimo campo” dla valeda, simbol dl passaje dal'agricultura al turism, abina la nstalazion adum pertes de chësta cuntreda che se muda y i mët ite te n ambient cuntrolà.
La plantes che vën ora de na vedla tiera da paur, vën cultivedes te goc de scipa, cun l aiut dla lum infracuecena, sciche sce les unissa salvedes da cundizions artifizieles. Ntëurvia, sul susot y parëis, possen usservé dessënies filigrei sun parëies y plafon, do la pitures dla Val de Fascia, che tol ndolauter y met adum formes nueves de plantes. L dessëni y la pert viva scumencia a se mescedé, tulan demez la desfrënzes danter usservazion y svilup.
L ntervënt de Oberkofler mët a jì na tenscion chieta danter cura y cuntrol, cultivazion y l jì ala nia, trasfurman la butëiga te n post da pensé do, ulache la lecurdanza, l'ecologia y l daunì dla cuntreda dla valeda de Gherdëina resta ala zibla te n balanz delicat.
