Yuyan Wang
∗1989, China
Yuyan Wang (1989, Qingdao, Cina) viv y lëura a Paris y tla Corsica. Ëila ie n’artista de film y de video y lëura dantaldut cun found footage (material da film abinà), che la urganisea da nuef, tol ndolauter y trasfurmea te lëures de film nueves. Te si video spidlea Wang i mecanisms de produzion, cunsum y assimilazion tl’industria dla imajes. Tres si elaburazion ti dà l’artista ai tòc de films abinei senificac y gerarchies nueves, crian nsci ambienc de imerscion dla sensazions.“Ntan dut mi pruzes de lëur muessa mi corp lauré ora na cumpëida de chedri da stramp granda. É scumencià a me nmaginé la retina belau coche na planta che fej la fotosintesa y che trasfurmea la lum te perzezion, memoria o nmaginazion”, spiega l’artista. “Me é for nteressà ala produzion de media zënza fin, che se stiza sun la produtività ndustriela. Chësta ndustrialisazion de chedri, che cuntentea i bujëns, me faszinea. I vën nsci cunsumei te na maniera plu intensiva, fac te na maniera fanatica y sambën nce cupiei y slargëi ora ala medema maniera. I ne vën povester nia mé tëuc su per unì udui, ma plutosc per unì partii, spustei y manipulei, datrai dala persones, ma plu suvënz dai algoritms.”
Tl zënter dla Sala Trenker, prejënta Wang Green Grey Black Brown (2024), na nstalazion video che mëina i vijitadëures de viers de na cuntreda sintetica de petruele luter y de plastica. L'opra ie metuda adum da pitli films che vën da cuntesć ndustriei y cumerziei, coche per ejëmpl da lueges de produzion dla plastica tla Cina dl Sud. L'opra analisea l mudamënt di senificac dla imagins, ntan che les zirculea tres sistems defrënc de adurvanza y de difujion.
Tres la cumposizion ritmica y la mujiga da film da Owner of a Lonely Heart, lasceda jì plu plan, se svilupea la nstalazion coche n ambient toch. Areai tachëusc, roba lutra y scura, y tecniches sintetiches se mescëida for inò, tulan nscila demez i cunfins danter formes natureles y chëles artifizieles.
L'opra ie metuda ora te n’architetura, che porta pro a na sensazion de imerscion, perdan nscila l urientamënt. L vijitadëur possa se senté ju sun n tepih de ierba finta, che ie metù ora ntëur ala nstalazion. Chël che vën ora ie na cuntreda speculativa mudeleda dal'estrazion y trasfurmazion, ulache l petruele devënta sibe n material che nce na metafora, che lieia adum pruzesc de produzion, de zirculazion y de cunsum.
