Dorota Gawęda & Eglė Kulbokaitė
∗1987, Lithuania, 1986, Poland
Dorota Gawęnda (1986, Lublin, Polonia) y Eglė Kulbokaitė (1987, Kaunas, Lituania) ie n duo de artistes cun sënta a Basel. Tramedoves à fat la laurea tl 2012 tl Royal College of Art a Londra y lëura bele dal 2013 incà deberieda.Si pratica artistica va sëura truep media ora, dal video y dala performance nchin ala nstalazion y ala pitura, suvënz cun la ntenzion de crië ambienc de imerscion che tol su sënsc defrënc - danter sonn y tof. L’arpejon dl’Europa urientela dla doi artistes ie da udëi te truepa dla figures che vën lecurdedes te si lëures: nina nanes y cianties populeres, figures mitologiches coche vampirs o rie spirc y rituai sacri – dut se à mescedà adum cun la manipulazion digitela y materiai ndustriei, fajan n puent danter uman y nia uman, naturel y sintetich, realtà y ilujion. “Folclor nes sà nteressant ajache l se lascia furmé dala cumuniteies tres l tëmp y l resta for n muvimënt; l à la putenzialità de nes mustré minonghes cuntreres y stories cuntreres.”
Tl Hotel Ladinia prejënta Gawęda y Kulbokaitė na nstalazion site-specific che mët adum scultura, sonn y lum. Elemënc dla serie Dead Ringer —pec de aluminium abinei dal CERN y de lën tratà cun jiefa — ie metui te na situazion de ativazion, mudelei tres na secuënza de lumes coreografiches che se muda danter vester mpiedes y destudedes. La scultures, che se mostra sciche n dopl nia mo finà, se muev danter l vester y l nia vester tlo.
La nstalazion se svilupea tres Brood (Scene 5: and her hair parted on the left side) (2026), n loop de sonn de 30 menuc, realisà cun l cor polifonich Isokratisses che ie lià ala tradizion dl'Epir (na region geografica y storica tl sud-ost dl'Europa, al didancuei spartida su danter la Grecia y l'Albania) y cun la mujiga OXHY. La cumposizion mët adum cianties de nina nanes, de lamentanzes y d'amor, te na strutura zitlica che rundenësc la cualiteies di crëps dla Dolomites. N sistem acustich a 360 gradi fej jì ntëur la ujes tres l local, ntan che la lum calibreda respuend a si ntensità, realisan nscila n ambient de cunfujion y dejuriantamënt cun fueres che rundenësc, n post che te mët a sté ert.
In collaboration with
