Leonardo Bürgi Tenorio
∗1994, Mexico/Switzerland
Leonardo Bürgi Tenorio (1994, Basel, Svizra) ie n artist messican-svizer che viv a Basel. Si pratica artistica ie dantaldut metuda adum da nstalazions, scultures y dessënies che trata l raport danter la persona y la natura, l naturel y artifiziel, la lerch architetonica y i ambienc naturei, coche nce l crëscer y l se desfé. Te si nstalazions tol l artist ca na gran varietà de materiai che va dai media artistics tradiziunei - coche l dessëni o la ceramica – y vën suvënz cumbinei cun elemënc organics coche plantes, tiera, fonc y d’autra ressorses dl mond naturel che pudëssa se svilupé o se desfé tl tëmp dla mostra. Te si lëur da permò al laurà cun l background coloniel y cun l cunliamënt danter na mini cësa de cultivazion (Wardian case) y l terrarium coche oget per l’estrazion biologica y tl medemo mumënt coche spersa de proiezion per na cunteda ecologica romantica.Bürgi ie atif tl ciamp dl cujiné, lauran ora nstalazions y performance che scumëncia cun la cundivijion y la produzion de roba da maië per ti jì permez a cuestions politiches, sozieles y cultureles. L artist fajova pert dl Kitchen Collective Hasoso dal 2014 al 2022, ulache i cumëmbri à n nteres deberieda per l cujiné, la performance y l ativism politich.
Per la Bienela Gherdëina 10 prejënta Bürgi Tenorio dessënies adum a terrariums, laurei ora per si mostra tl Kunsthaus Baselland. Chësta strutures readymade fej da microambiënt stlut, uniun cun na cunstelazion metuda su a puntin de pec, materiai desfrënc y elemënc organics. Per chësta prejentazion à l'artist crià chisc terrariums tres na nrescida fata sul post te Gherdëina, metan ite elemënc desfrënc, fotografies y lecurdanzes abinedes adum tl luech. Uni singul devënta n sistem autonom, che se adatea a puntin n relazion a si cuntest nuef, mantenian nce si carater artifiziel y costruì.
I terrariums ie storicamënter pensei per l'estrazion, la cultivazion y la desmustrazion de formes de vita esotica. Al didancuei i vëijen sciche aparac ambivalënc y banai: tl medemo mumënt iesi posć de cura y de cuntrol, de intimità y destanza. Nsci pitli y stluc ite, pieti n'ancunteda cun n imagin dla natura che ie daujin y saurida da capì.
Ti cialan ai dessënies y ai terariums, mët i lëures adum doi monc paralei, ulache elemënc dla natura y dla cultura viv adum te n balanz zite y nia stabil.
