Evelyn Taocheng Wang
∗1981, China
Evelyn Taocheng Wang (1981, Chengdu, Cina) viv y lëura a Rotterdam. Te si chedri mëtela adum tecniches tlassiches cinejes y scritura cun reflescions y cumentares sun la cultura y la storia dl’ert uzidentela. Do n stude d’ert tradiziunela cineja a Nanjing ala stlut ju si studies tla Städelschule a Frankfurt y pra De Ateliers a Amsterdam. Te si pitures, nstalazions tl spazium, video y performance se dà l’artista ju cun i cunzec de identità y purtenienza n cont dla cultura, dla migrazion, ma nce dla tlas soziela y dl sés. La mët adum elemënc pitorics mujiei, geometries lineères, scritures y dessënies, che fej da una na pert referimënt a elemënc culturei dla storia dl’ert dl uzidënt y dl urient y descëida ora dal’autra pert lecorc persunei y details autobiografics.“Ie cunscidre mi “pitura cineja” coche na assoziazion de performance tla fundamënta dla rujeneda. La pudëssa unì ududa coche metafora de “tinta sun papier” y ie tl medemo mumënt n referimënt al cunzet de “uele sun tëila”. L’imitazion dla pitura de Agnes Martins (per mé iel n se fé patron de n bon spirt) ie n cunfront critich cun la storia dl’ert, che cuntën na cumprenscion per tematiches defrëntes, per ejëmpl inuzënza, cuscienza plëina y reprejentazion.”
Tl Hotel Ladinia, prejënta Wang cater chedri nueves, granc 50 x 50 cm, che fej pert dla serie Princess and the Frog, metui ora ntëur l banco y tla lounge coche prejënzes chietes, ma che tol purempò pert ala ancuntedes da uni di. Te uni scena iel da udëi la figura dl crot, che ti cëla a luesc che ie da cunëscer, posć che vën filtrei tres imagins familieres, belau stereotipedes dla zirculazion glubela. Chisc lëures, scialdi persunei, funziunea sciche tòc de na storia plu longia che possa nce se mudé: na pert de diare, na pert nventeda o na pert che fej da traduzion culturela. La Prinzëssa Crot vën dant sibe coche usservadëura, che coche partezipanta, che passa tres paesajes cunesciui, ma nce per nëus fulestieres.
Tulan ispirazion dala fabula, la trasfurmea Wang te na reflescion n con' dl'identità melsegura y dl mudamënt. Depënc cun na cërta lesirëza y mpue da zonf, se muef i lëures danter hez y scich, dajan da ntënder che la purtenienza, coche l verzon, ne n'ie mei fërma, ma for n trasfurmazion, realiseda tres la memoria, la pruiezion y la nvenzion che n fej for inò da nuef.
In collaboration with
