Walter Niedermayr
∗1952, Italy
Walter Niedermayr (1952, Bulsan, Talia) viv y lëura te Südtirol. L vën cunscidrà un di fotografs talians dl mumënt plu mpurtanc y si vijion artistica se dà ju te na maniera unica cun l spazium, sibe architetonich che dla cuntreda. La lerch vën ntenduda coche n luech ocupà dala persona y coche tel portel a lum ejëmpli de vita, cuntedes y stories che se svilupea laite.Raions alpins y strutures urbanes, architetures y ndustries, coche nce perjons y spediei y si manieres de viver cunliedes ie i argumënc y i posć costanc per si mpënies artistics. “L ie n raport danter chël che nëus fotografon y la realtà, ma chël che la fotografia nes conta ie mo n’autra realtà. L ie na trasfurmazion de chël che n vëija. Fove for nteressà al raport danter la realtà dl spazium y la realtà dl’imaja.”
Dlongia si produzion fotografica, fej Niedermayr nce lëures video. Ntan che si fotografies sotrissea n sentimënt putenziel de dinamism, semeiela che te si video vëniel tres l chiet dla camera y tres la curnisc stara dlacià ite lueges y situazions tl spazium y tl tëmp.
I lëures de Niedermayr ie metui ora te doi posć desfrënc.
Te n vedl tublà a S. Cristina iel da udëi si proiet fotografich Koexistenzen, n lëur mo nia finà. La fotografies ie metudes ora sun casses, uni una a n'autëza defrënta y te pusizions particuleres de passaje, per ti jì nscila de contra ala maniera de taché su tradiziunela y stara. Chësta maniera de taché su, fej pensé do al soget nstës dl'opra: la realtà storica y cuntemporana dla cumenanza alpina che vën nfluenzeda da l avëi spartì y dala gestion culetiva dla cosses. Tla Val de Flëm y ti raions ntëurvia, ulache la cultura taliana, tudëscia y chëla ladina se mescëida, ne vën l’idea di 'commons' (l bën di chemuns) nia a lum coche n model idealisà, ma coche na cundizion vivuda y marciadeda ora, na cundizion che porta pro sibe a na continuità che a na tenscion.
L segondo lëur, che ie metù ora tl Museum de Gherdëina, slergia ora chësta nrescida te n cuntest plu desferënt. N cunlaurazion cun Marina Ballo Charmet à Niedermayr realisà Casanza (2022), na nstalazion video a doi canai, che ie unida tëuta su tla perjon dl'ëiles sun l'ijula dla Giudecca. Tl zënter dla perjon iel n gran verzon, che vën curà dala perjunieres deberieda a na grupa de ulenteres. La videocamera mantën na pusizion de usservazion scëmpla, lascian pro che la routine da uni di, de senté ora plantes, lauré tl verzon y se muever ncantëur, suzed zënza mpustazions metudes dant. Cie uel pa dì per l'ëiles vester zaredes ite te n frabicat che pieta lerch per l muvimënt ala lergia, la criatività, la comunicazion y l lauré cun la natura y la tiera? Possel pa vester che per la perjunieres, cialan sun l verzon y se dajan ju cun la natura, se gëura per ëiles autra pruspetives?
