Giulia Cenci
∗1988, Italy
Giulia Cenci (1988, Cortona, Talia) viv y lëura a Cortona.Si pratica artistica vën dantaldut ora tres la scultura y la nstalazions de imerscion, ulache elemënc che vën ora dal mond di tieres ruva adum y se mescëida cun figures umanes o sintetiches. Tla lidëza de si studio tla Toscana lëura Cenci persunalmënter cun vedl fier y refudam ndustriel, i ntegran cun materiai naturei (sciche cënder o grafit) y modiei de elemënc anatomics. Chësc pruzes porta a creazions ibrides che mët la fundamënta per n cunliamënt sot danter l artifiziel y l naturel: “L’idea de produzion tres creatures, tieres y d’auter - y l’idea dla “produzion dla vita” - ie suvënz prejënta te mi nrescides. Ie assozieie chësta sort de produzion cun na ciadëina de montaje che ne fina nia, ulache ala creatures ti vëniel tëut la lidëza y l’autonomia.”
La scultures de Cenci vën suvënz metudes ora te grupes, crian nsci ambienc de imerscion ulache l vën ora na cunteda coletiva - coche per ejëmpl tla nstalazion dead dance, 150 metri longia y penseda per la Bienela de Unieja dl 2022, o tla grupa de figures dal titul secondary forest, sun ncëria dl park High Line che l’artista à fat tl 2024.
Te doi lueges defrëntes, prejënta Giulia Cenci scultures de corps che se muev danter svilup y jì do ju. Tla Sala Trenker se auza na forma vertichela de aluminium sciche n ciof desfurmà, metan adum osc, rames y tòc mecanics te na strutura che va inò adum te sé nstëssa. Si muvimënt dà da ntënder sibe l'emerscion, che l'ejaurimënt, sciche sce l pruzes dl jì inant fossa inò tl lëur de mudé direzion y jì dereviers.
Tl Hotel Ladinia ie da udëi the hollow men #3 sul lim strënt danter na porta che ie n funzion y una che ne se lascia nia giaurì. La forma a doi piesc, cun l cë de n lëuf y metuda adum da elemënc scheletics y dl mond dla plantes, ie tacheda su te na luegia ncompra. Si pel, belau trasparënta, lascia udëi i strac che ie dedite, mustran nscila l corp sciche velch de metù adum y nia de ntier.
Deberieda prejënta i lëures na cunvivënza defrënta danter formes de sistems organics y ndustriei: formes che semea vives, ma che resta melsegures te si stabilità.
