Jacopo Belloni
∗1992, Italy
Jacopo Belloni (1992, Ancona, Talia) viv y lëura danter Roma y Genova. Si pratica tol ite la nstalazion, la scultura y la performance, tresora cun la ntenzion de tò y jì i cunfins danter animà y nia animà, realtà y ilujion, uman y nia uman. I lëures de Belloni se svilupea suvënz y se trasfurmea tla lerch dla mostres, sotrissan si fragilità y si crissa de cumpletëza. La pratica dl artist tol ite uni iede materiai y tecniches nueves - dala sëida nchin al mitel, dala scipa nchin al gumi de ciom, te n pruzes de mparé che ne fina mei y che ie for daviert.“L me sà bel canche l publich scumëncia a mëter n descuscion la vita tla cosses, straican ora la linies danter oget y soget, danter persona che fej y persona tucheda, danter vita y mort. Chëstes ie la tenscions che cële de dé inant tres mi lëures, speran che uni persona se n vede cun plu dumandes n cont dla realtà, mpede la azeté coche data”.
Tl sotët dla vedla scola a S. Cristina prejënta Belloni Dormancy, na nstalazion che se svilupea te n rit chiet de supeltura, n sëni tragich per la sfanteda, ma lascian nce lerch ala puscibltà de nascer da nuef. L'opra ie strutureda tres doi scultures che nriesc sibe la dimenscion biologica che nce chëla emoziunela.
La prima, The Sleepers, ie metuda adum da formes de scipa trasparëntes cun laite sumënzes de Gherdëina, jites a crì cun la jënt dl luech. Chësta scultures, dassën delicates, semea cosses da uni di coche tasces y flucions, che se trasfurmea te capsules dl tëmp per mantenì n vita la vita ndurmenzeda.
La segonda scultura, Nenie, lascia udëi aparac de destilazion de ram che bel plan sua ora essenzes calmantes dala plantes alpines, lascian ora tl local gotes da n bon tof. Tres chësc pruzes, var per var, tol la nstalazion su n ritm feter rituel, danter cura, plura y rigenerazion.
Deberieda desmostra chisc lëures na cundizion de chiet. I vijitadëures ie nviei a se dé ju cun l pez se tulan dlaurela, ulache l uet ne n'ie nia l'assënza, ma na cundizion dl vester, n mumënt ulache la vita se tira zeruch, y mpo resta inant bel achiet via.
Supported by
